യുണിക്സ്

യുണിക്സിന്റെ ആദ്യകാല ഉപജ്ഞാതാക്കളില്‍ പ്രധാനികളായ കെന്‍ തോംസണ്‍ (ഇടത്ത്) ഡെന്നിസ് റിച്ചിയോടൊപ്പം (വലത്ത്)

യുണിക്സ് എന്നത് കമ്പ്യൂട്ടര്‍ രംഗത്തെ ഒരു സുപ്രധാന ഓപ്പറേറ്റിങ്ങ് സിസ്റ്റം ആണ്. 1960-1970 കാലഘട്ടങ്ങളിലായി അമേരിക്കന്‍ ഐക്യനാടുകളിലെ എ.ടി.&ടി ബെല്‍ ലബോറട്ടറിയില്‍ കെന്‍ തോംസണ്‍, ഡെന്നിസ് റിച്ചി, ഡഗ്ലസ് മക്‌റോയ് തുടങ്ങിയവരുടെ പ്രയത്ന ഫലമായി രൂപം കൊണ്ട യുണിക്സ്, നിരവധി സര്‍വ്വകലാശാലകളുടെയും, സോഫ്റ്റ്‌വെയര്‍ കോര്‍പറേഷനുകളുടെയും, വ്യക്തികളുടെയും ആവശ്യങ്ങള്‍ക്കനുസരിച്ച് വളരെയേറെ പരിണാമങ്ങള്‍ക്ക് വിധേയമായി.

കെന്‍ തോമ്‌പ്‌സണ്‍, ഡെന്നിസ്‌ റിച്ചി, ഡഗ്ലസ്‌ മക്‌ല്‍റോയ്‌ തുടങ്ങിയ മഹാരഥന്മാരുടെ മസ്തിഷകശിശുവായി പിറവിയെടുത്ത യുണിക്സ്‌, എക്കാലത്തെയും മികച്ച ഓപ്പറേറ്റിംഗ്‌ സിസ്റ്റങ്ങളുടെ പട്ടികയില്‍ മാന്യമായ ഒരു സ്ഥാനം അര്‍ഹിക്കുന്നു. ഇന്നത്തെ യുണിക്സ്‌ സിസ്റ്റങ്ങള്‍ വിവിധ ശാഖകളായി പിരിഞ്ഞു പോയിരിക്കുന്നു. കാലാനുഗതമായി എടി ആന്‍ഡ്‌ ടി തന്നെ വികസിപ്പിചെടുത്ത വിവിധ യുണിക്സ്‌ സിസ്റ്റങ്ങളും, മറ്റു പല യുണിക്സ്‌ ദാതാക്കള്‍ സ്വന്തമായി വികസിപ്പിച്ചെടുത്ത സിസ്റ്റങ്ങളും,ലാഭേച്ഛയില്ലാതെ പ്രവര്‍ത്തിക്കുന്ന സംഘടനകള്‍ വികസിപ്പിച്ചെടുത്ത യൂണിക്സ്‌ സിസ്റ്റങ്ങളും എല്ലാം ചേര്‍ന്ന ആ പട്ടിക വളെരെ പലുതാണ്‌.

യുണിക്സിന്റെയും സമാനമായ സിസ്റ്റങ്ങളുടെയും വര്‍ഗ്ഗീകരണം

യൂണിക്സിന്റെ നിലവിലുള്ള പകര്‍പ്പവകാശം ഓപ്പണ്‍ ഗ്രൂപ്പിനാണ്‌ (The Open group), പക്ഷേ യൂണിക്സിന്റെ സോഴ്സ്‌ കോഡിന്റെ അവകാശത്തര്‍ക്കം ഇപ്പോഴും നടക്കുന്നതേയുള്ളൂ നോവെലും, സ്കോയുമാണ്‌ അതില്‍ അവകാശമുന്നയിച്ചിരിക്കുന്നത്‌. ഏക യൂണിക്സ്‌ വിവരണം (Single Unix Specification) എന്ന മാനദണ്ഡം പിന്തുടരുന്ന ഓപ്പറേറ്റിംഗ്‌ സിസ്റ്റങ്ങള്‍ മാത്രമേ "യുണിക്സ്‌" എന്ന പേരിന്‌ യോഗ്യരാവൂ (യുണിക്സുമായി സാമ്യമുള്ള ഗ്നൂ പോലെയുള്ള ഓപ്പെറേറ്റിംഗ്‌ സിസ്റ്റങ്ങള്‍ പൊതുവേ "യൂണിക്സുപോലെയുള്ള എന്നര്‍ത്ഥം വരുന്ന "യുണിക്സ്‌ ലൈക്‌" - Unix Like ഓപ്പറേറ്റിംഗ്‌ സിസ്റ്റം എന്നാണ്‌ അറിയപ്പെടുന്നത്‌).

1980ന്റെ തുടക്കത്തില്‍ വിദ്യാഭ്യാസസ്ഥാപനങ്ങളില്‍ യുണിക്സ്നിനുണ്ടായിരുന്ന സ്വാധീനം വ്യവസായിക അടിസ്ഥാനത്തില്‍ യുണിക്സ്‌ നിര്‍മ്മിക്കുന്നതിന്‌ കാരണമായി. വ്യാവസായികാടിസ്ഥാനത്തില്‍ യുണിക്സ്‌ പതിപ്പുകള്‍ ഉണ്ടാക്കുകയും വിറ്റഴിക്കുകയും ചെയ്ത കമ്പനികളില്‍ സണ്‍ മൈക്രോസിസ്റ്റംസ്‌ പ്രമുഖരാണ്‌.

യുണിക്സ്‌ ഓപ്പറേറ്റിംഗ്‌ സിസ്റ്റം സെര്‍വറുകളിലും, വര്‍ക്ക്സ്റ്റേഷനുകളിലും പരക്കെ ഉപയോഗിച്ചുവരുന്നു.ഇന്റര്‍നെറ്റിന്റെ ആവിര്‍ഭാവത്തിലും,കമ്പ്യൂട്ടര്‍ നെറ്റ്‌വര്‍ക്കുകളുടെ വികസനത്തിലും യൂണിക്സ്‌ ഓപ്പറേറ്റിംഗ്‌ സിസ്റ്റത്തിനുല്ല പങ്ക്‌ അവഗണിക്കാവുന്നതല്ല.

സി പ്രോഗ്രാമിംഗ്‌ ഭാഷയും, യൂണിക്സും എടി ആന്‍ഡ്‌ ടി വികസിപ്പിച്ചെടുത്ത്‌ സര്‍ക്കാര്‍ സ്ഥാപനങ്ങള്‍ക്കും സര്‍വ്വകലാശാലകള്‍കും നല്‍കി, അതുകൊണ്ടുതന്നെ മറ്റേത്‌ ഓപ്പറേറ്റിംഗ്‌ സിസ്റ്റങ്ങളേക്കാളും കൂടുതല്‍ തരം കമ്പ്യൂട്ടറുകളിലേക്ക്‌ പോര്‍ട്ട്‌ ചെയ്യപ്പെട്ട ഒരു ഓപ്പറേറ്റിംഗ്‌ സിസ്റ്റമാണ്‌ യുണിക്സ്‌.

യുണിക്സ്‌ ഓപ്പറേറ്റിംഗ്‌ സിസ്റ്റം വിഭാവനം ചെയ്തത്‌ തന്നെ, പോര്‍ട്ടബിലിറ്റി, മള്‍ട്ടി ടാസ്കിംഗ്‌,മള്‍ട്ടി യൂസര്‍ തുടങ്ങിയ ആശയങ്ങള്‍ക്ക്‌ മുന്‍ തൂക്കം കൊടുത്തുകൊണ്ടാണ്‌.

ചെറിയ ചെറിയ പ്രോഗ്രാമുകളെ പൈപ്പ്‌ എന്ന സങ്കേതം ഉപയോഗിച്ച്‌ ഒരുമിപ്പിക്കാനും അതുവഴി സങ്കീര്‍ണ്ണമായ പ്രവൃത്തികള്‍ അവയെക്കൊണ്ടു ചെയ്യിക്കാനുമുള്ള യുണിക്സിന്റെ കഴിവ്‌ പ്രശസ്തമാണ്‌.സങ്കീര്‍ണ്ണമായ വലിയ ഒരു പ്രോഗ്രാം നിര്‍മ്മിക്കുന്നതിലും എളുപ്പമാണല്ലോ ലളിതമായ ഒന്നിലധികം പ്രോഗ്രാമുകള്‍ നിര്‍മ്മിച്ച്‌ അവയെ യോജിപ്പിച്ചെടുക്കുന്നത്‌.

യുണിക്സില്‍ ഇത്തരം അനവധി ചെറുപ്രോഗ്രാമുകളും അവയെ നിയന്ത്രിക്കനായി കെര്‍ണല്‍ എന്നറിയപ്പെടുന്ന ഒരു പ്രധാന പ്രോഗ്രാമുമുണ്ട്‌. കെര്‍ണല്‍ എന്ന ഈ ഭാഗം പ്രോഗ്രാമുകളെ പ്രവര്‍ത്തിപ്പിക്കാനും അവയുടെ പ്രവര്‍ത്തനത്തെ തടസ്സപ്പെടുത്തുവാനുമുള്ള സേവനങ്ങളും, മറ്റുപ്രോഗ്രാമുകള്‍ പൊതുവായി ഉപയോഗിക്കുന്നതുമായ ചില ഉന്നത തല പ്രവര്‍ത്തനങ്ങളും (High level tasks),ഹാര്‍ഡ്‌വേര്‍ മേല്‍നോട്ടവും എല്ലാം ചെയ്യുന്നു.

പെഴ്സണല്‍ കമ്പ്യൂട്ടറുകളില്‍ നിന്നു വ്യത്യസ്തമായി, അനേകം ഉപയോക്താക്കള്‍ക്ക് ഒരേ സമയം നെറ്റ്‌വര്‍ക്ക് വഴി ബന്ധിപ്പിച്ച് പ്രവര്‍ത്തിക്കാവുന്ന മള്‍ട്ടി യൂസര്‍, മള്‍ട്ടി ടാസ്കിങ് ആര്‍ക്കിടെക്ചര്‍ യുണിക്സിനെ വേറിട്ടു നിര്‍ത്തുന്നു. ടൈം ഷെയറിങ് അഥവാ സമയവിഭജനം എന്ന കമ്പ്യൂട്ടര്‍ സാങ്കേതികതയിലൂടെയാണ് ഇത്തരത്തില്‍ യുണിക്സിന് പ്രവര്‍ത്തിക്കാനാകുന്നത്. അനേകം ടെര്‍മിനലുകളില്‍ നിന്ന് സെര്‍വറിലേക്ക് ബന്ധപ്പെടുത്തി പ്രവര്‍ത്തിപ്പിക്കുന്ന ഈ രീതിയെ ക്ലയന്റ്/സെര്‍വര്‍ ആര്‍ക്കിടെക്ചര്‍ എന്നാണ് വിശേഷിപ്പിക്കാറ്. യുണിക്സ് സോഴ്‌സ്‌കോഡ് സി ലാങ്‌വേജ്(C) എന്ന കമ്പ്യൂട്ടര്‍ ഭാഷയിലാണ് എഴുതപ്പെട്ടിട്ടുള്ളത്. അനേകം ഹാര്‍ഡ്‌വെയര്‍ കമ്പ്യൂട്ടറുകളിലേക്ക് പോര്‍ട്ട് ചെയ്യപ്പെട്ടിട്ടുള്ളതിനാല്‍ യുണിക്സിനെ പോര്‍ട്ടബിള്‍ സിസ്റ്റം, തുറന്ന വ്യവസ്ഥ എന്നര്‍ഥം വരുന്ന ഓപ്പണ്‍ സിസ്റ്റം എന്നൊക്കെ വിശേഷിപ്പിക്കാറുണ്ട്. കാല്‍നൂറ്റാണ്ടിന്റെ കമ്പ്യൂട്ടര്‍ ചരിത്രത്തില്‍ യുണിക്സിന്റെ സ്ഥാനം അഗ്രഗണ്യവുമാണ്. യുണിക്സിനെപ്പറ്റി അതിന്റെ രചയിതാക്കളില്‍ ഒരാളായ ഡെന്നി റിച്ചി പറയുന്നത് ശ്രദ്ധിക്കുക: അടിസ്ഥാനപരമായി യുണിക്സ് ലളിതമായ ഒരു ഓപ്പറേറ്റിങ്ങ് സിസ്റ്റം ആണ്. പക്ഷേ ആ ലാളിത്യം മനസ്സിലാക്കുവാനന്‍ ഒരു ബുദ്ധിമാനേ കഴിയൂ.- ഡെന്നിസ് റിച്ചി സണ്‍ മൈക്രോസിസ്റ്റംസ്, ഐ.ബി.എം, എച്ച്.പി. തുടങ്ങിയ കമ്പനികളുടെ വാണിജ്യാടിസ്ഥാനത്തിലുള്ള യുനിക്സ് അവാന്തരങ്ങളും, യുണിക്സിനോടു സാദൃശ്യമുള്ള ലിനക്സ് എന്ന ഓപ്പണ്‍സോഴ്‌സ് ഓപ്പറേറ്റിങ്ങ് സിസ്റ്റവുമാണ് സെര്‍വര്‍ മാര്‍ക്കറ്റില്‍ മുന്നിട്ടു നില്‍ക്കുന്നത്.

[തിരുത്തുക] ചരിത്രം

[തിരുത്തുക] 1960-1970കളുടെ കാലഘട്ടം

1960കളില്‍ എ.ടി.&ടി. ബെല്‍ ലബോറട്ടറി, മസ്സച്യുറ്റസ് ഇന്‍സ്റ്റിറ്റ്യൂട്ട് ഓഫ് ടെക്നോളജി, ജനറല്‍ ഇലക്ട്രിക്ക് എന്നീ കമ്പനികള്‍ പരീക്ഷണാര്‍ഥം മള്‍ട്ടിക്സ് (Multics - Multiplexed Information and Computing Service) എന്ന പേരില്‍ ഒരു ഓപ്പറേറ്റിങ്ങ് സിസ്റ്റം രൂപകല്‍പ്പന ചെയ്തു. GE-645 എന്ന മെയിന്‍ഫ്രെയിം കമ്പ്യൂട്ടറിനു വേണ്ടി നിര്‍മ്മിച്ച മള്‍ട്ടിക്സ്, വാണിജ്യാടിസ്ഥാനത്തില്‍ ഒരു വിജയമായില്ല. ഇതിനെ തുടര്‍ന്ന് കെന്‍ തോംസണ്‍, ഡെന്നിസ് റിച്ചി എന്നിവര്‍ ഡി.ഇ.സി പി.ഡി.പി.-7 (DEC PDP-7) എന്ന കമ്പ്യൂട്ടറിനു വേണ്ടി ഒരു പുതിയ ഫയല്‍ സിസ്റ്റവും ഓപ്പറേറ്റിങ്ങ് സിസ്റ്റവും പരികല്പന ചെയ്തു. യുണിക്സ് (Unics, short for Uniplexed Information and Computing System) എന്നു വിളിക്കപ്പെട്ട ഈ ഓപ്പറേറ്റിങ്ങ് സിസ്റ്റം ഒരേ സമയം രണ്ട് ഉപയോക്താക്കള്‍ക്ക് ഉപയോഗിക്കാന്‍ കഴിഞ്ഞിരുന്നു. ബ്രയാന്‍ കെര്‍ണിഗാന്‍ ആണ് യുണിക്സ് (Unics) എന്ന പേരു നല്‍കിയത്. പിന്നീട് Unics എന്നത് ഇന്നത്തെ രീതിയില്‍ Unix എന്ന് പുനര്‍നാമകരണം ചെയ്യപ്പെട്ടു. ഇതോടെ, ഇതിനു കൂടുതല്‍ പ്രാധാന്യം ലഭിക്കുകയും, ബെല്‍ ലബോറട്ടറിയില്‍ നിന്ന് സാമ്പത്തിക സഹായം ലഭ്യമാവുകയും ചെയ്തു. ഒപ്പം കൂടുതല്‍ പ്രോഗ്രാമുകളും യൂട്ടിലിറ്റികളും ചേര്‍ത്ത് ഇതിനെ ഔദ്യോഗികമായി, യുണിക്സ് എന്ന പേരില്‍ ഉയര്‍ത്തിക്കാട്ടുകയും, 1971-ല്‍ യുണിക്സ് പ്രോഗ്രാമെഴ്‌സ് മാനുവല്‍ പ്രസിദ്ധീകരിയ്ക്കുകയും ചെയ്തു.

1973-ല്‍ യുണിക്സിനെ സി പ്രോഗ്രാമിങ് ഭാഷയില്‍ പുനരാവിഷ്കരിക്കുന്നതിനുള്ള പദ്ധതികളാവിഷ്കരിച്ചു. ഇത് യുണിക്സിനെ സര്‍വ്വകലാശാലകളിലും യു.എസ്. സര്‍ക്കാരിന്റെ വിവിധ ഡിപ്പാര്‍ട്ട്മെന്റുകളിലും സര്‍വ്വസാധാരണമാക്കി. തുടര്‍ന്ന് 4,5,6 വെര്‍ഷനുകള്‍ പ്രസിദ്ധീക്കരിക്കുകയും സോഫ്റ്റ്‌വെയര്‍ പൈപ്പ്‌ലൈനുകള്‍ പോലുള്ള സങ്കീര്‍ണ്ണതയുള്ള സാങ്കേതികതകള്‍ യുണിക്സില്‍ ആവിഷ്കരിക്കുകയും ചെയ്തു. 70കളുടെ അവസാനത്തോടെ സര്‍വ്വകലാശാലകള്‍ക്കുമപ്പുറം കോര്‍പ്പറേറ്റ് സര്‍വ്വീസ് മേഖലകളിലും യുണിക്സിന്റെ ജൈത്രയാത്ര ആരംഭിച്ചു.

[തിരുത്തുക] 1980കള്‍

1982-ല്‍ എ.ടി.&ടി. യുണിക്സ് സിസ്റ്റം III വാണിജ്യാടിസ്ഥാനത്തില്‍ പുറത്തിറക്കുന്നു. യുണിക്സ് സിസ്റ്റം V വെര്‍ഷനോടെ, മറ്റു പല യുണിക്സ് അവാന്തരങ്ങളുടെയും പ്രത്യേകതകള്‍ ഇതില്‍ ഒന്നിച്ചു ചേര്‍ക്കപ്പെട്ടു. ബെര്‍ക്ക്ലി സോഫ്റ്റ്‌വെയറിന്റെ വി.ഐ. എഡിറ്റര്‍, കഴ്സസ് പാക്കേജ് എന്നിവ ഇതിലുള്‍പെടുന്നു.

യുണിക്സ് വെര്‍ഷനുകളില്‍ യുണിക്സ് സിസ്റ്റം V, ബെര്‍ക്ക്‌ലിയുടെ ബി.എസ്.ഡി എന്നിങ്ങനെ രണ്ടു ചേരികളിലായി പല വാണിജ്യ വെര്‍ഷനുകളും ലഭ്യമാകാന്‍ തുടങ്ങി. 1982ല്‍ ബെര്‍ക്ക്‌ലിയിലെ, ബില്‍ ജോയ് എന്ന മിടുക്കനായ മുന്‍നിര പ്രോഗ്രാമര്‍ സണ്‍ മൈക്രോസിസ്റ്റംസ് എന്ന കമ്പനിസ്ഥാപിച്ചു. ഇങ്ങനെയാണ് പ്രശസ്തമായ സണ്‍ ഓ.എസ്സിന്റെ തുടക്കം. 80കളില്‍ ക്സെനിക്സ് എന്ന പേരില്‍ ഇന്റെല്‍ പ്രോസ്സസ്സറുകളില്‍ ഓടുന്ന വെര്‍ഷന്‍ കൊണ്ടു വരുകയും പിന്നീടത് സ്‌കോ യുണിക്സ് എന്ന പേരില്‍ കൈമാറ്റപ്പെടുകയും ചെയ്തു.

1984ല്‍ വിവിധ യുണിക്സ് ഓപ്പറേറ്റിങ് സിസ്റ്റങ്ങളെ എകീകരിക്കുന്നതിനായി എക്സ്/ഓപ്പണ്‍ (X/Open) എന്ന പേരില്‍ ഒരു വാണിജ്യ കൂട്ടായ്മ രൂപീകരിക്കപ്പെട്ടു. എ.ടി.&ടി.യുടെയും സണ്‍ മൈക്രോസിസ്റ്റത്തിന്റെയും യുണിക്സുകളെ ഒരു കുടക്കീഴില്‍ കൊണ്ടു വരുന്നതിന് ഈ സംരംഭം ഉപകരിച്ചു.

[തിരുത്തുക] 1990കള്‍

[തിരുത്തുക] 2000 മുതല്‍

[തിരുത്തുക] യുണിക്സിന്റെ പ്രധാനപ്പെട്ട ഉപവിഭാഗങ്ങള്‍

[തിരുത്തുക] കെര്‍ണല്‍ പാളി

യുണിക്സിന്റെ കാതലായ ഭാഗമാണ് കെര്‍ണല്‍ . ഹാര്‍ഡ്‌വെയറിനെയും ഓപ്പറേറ്റിംഗ് സിസ്റ്റത്തിനേയും തമ്മില്‍ ബന്ധിപ്പിക്കുന്ന ഒരു സുപ്രധാന കണ്ണിയാണിത്. മാത്രവുമല്ല, ഓപ്പറേറ്റിംഗ് സിസ്റ്റത്തിനുള്ളിലെ സ്‌ട്രക്ചറുകളെ അപ്പ്ലിക്കേഷനുകളില്‍ നിന്നും വേര്‍തിരിച്ച് നിര്‍ത്തുന്നതിലൂടെ അപ്ലിക്കേഷന്‍ പ്രോഗ്രാമിംഗ് കൂടുതല്‍ ലളിതമാക്കുന്നു. യുണിക്സിന്റെ മെമ്മറി നിര്‍വഹണം, ഇന്‍പുട്ട്/ഔട്ട്പുട്ട് സംവിധാനങ്ങളുടെ നിര്‍വഹണം, ഡിവൈസുകളുടെ നിയന്ത്രണം തുടങ്ങി ഉപയോക്താവിന് അത്യന്തം ദുരൂഹവും, ദുഷ്കരവുമായ ഒട്ടനവധി സുപ്രധാന ചുമതലകളാണ് കെര്‍ണല്‍ നിര്‍വഹിക്കുന്നത്. ഇത്തരത്തില്‍ കെര്‍ണല്‍ നിര്‍മ്മിക്കുന്നതിനും സവിശേഷവല്‍ക്കരിക്കുന്നതിനും ഒക്കെയായി ചെയ്യുന്ന പ്രോഗ്രാമിംഗിനെ കെര്‍ണല്‍ പ്രോഗ്രാമിംഗ് എന്നു വിളിക്കുന്നു.

[തിരുത്തുക] ഷെല്‍ പാളി

[തിരുത്തുക] അപ്പ്ലിക്കേഷന്‍ പാളി

[തിരുത്തുക] യുണിക്സിനോടു സാമ്യമുള്ള മറ്റു ഓപ്പറേറ്റിങ് സിസ്റ്റമുകള്‍

[തിരുത്തുക] ഗ്നു/ലിനക്സ്

ഗ്നു/ലിനക്സ് യൂനിക്സിനോട് വളരെ സാമ്യമുള്ള ഓപ്പറേറ്റിംഗ് സിസ്റ്റമാണ്. യൂനിക്സിനെ അടിസ്ഥാനമാക്കിയാണ് ഇത് നിര്‍മ്മിച്ചിരിക്കുന്നത്.

[തിരുത്തുക] പുറം വായന

1. യൂണിക്സിന്റെ ചരിത്രം, ബെല്‍ ലാബ്‌സിന്റെ വെബ് സൈറ്റില്‍

ഈ ലേഖനം അപൂര്‍ണ്ണമാണ്. ഇതു പൂര്‍ത്തിയാക്കുവാന്‍ സഹകരിക്കുക.